呢個幾禮拜日日都係咁出汗做運動,果種感覺愈黎愈強烈,好似讀書時係京士柏打波咁,唔同既係果時唔停打幾個鐘都唔覺有問題,而家跑三十五分鐘都係差D唔得,體能既野真係唔到你牙擦擦,不過對呢種日日都做運動既情節,令我諗起一個人...

記得當年我只係剷籃,爆籃同勾手都足夠可以立足,但係射波就真係好水,就係果陣時我識左楊伯,楊伯冇咩野叻,但係佢教射波就真係有一手,佢既金句到而家我都仲記得,每次記起都會笑一笑,因為當中混雜左D粗口,係楊伯教咁多人當中,我射波係最屎,十球只係中六球,不過佢冇話過我,反而同我講如果我識埋射波,就會好全面,佢仲話我係佢既楊家將中左手發揮最好既一個,當然啦,我左手嫁嘛...

讀完書之後都好少上京士,都好少見到楊伯,記得有一次係街到見到佢,佢話佢老喇,身體又唔好又多病,唔夠氣力行上京士喇,我見到佢都瘦左好多,幾年之後都有上過京士打過波,剷籃勾手冇哂手感,但竟然射球好準,我都唔明咩原因,D朋友都話我轉左型,有人解釋話可能當年我太專注剷籃,所以對射波冇信心,不過點都好,我都係用緊楊伯套理論黎射波,話哂我都係楊家將喎~